La demonstraziun haja cumenzà paschaivlamain. La polizia aveva rinforzà massivamain sia preschientscha en il lieu. En acziun èn radund 20'000 forzas da segirtad. Ils organisaturs da la demonstraziun quintan cun radund 10'000 critichers da las consequenzas da la globalisaziun.
Appell a la cunscienzia sociala da regenzas e presidents
Organisaziuns d'agid ed activists ha appelà avant la conferenza dals G7 a la cunscienzia sociala dals schefs da stadi e regenza. L'inscunter na dastgia betg degenerar ad ina show. I giaja per il cumbat cunter la povradad e la fom, ha avertì l'organisaziun da la protecziun d'uffants World Vision.
Uffants en la Siria ed en autras regiuns da conflict sajan sin la vart dals perdiders. La chanceliera tudestga Angela Merkel è sa declerada per la finamira da vulair eliminar fin l'onn 2030 la povradad extrema.
Pre-demonstraziuns gia la notg sin sonda
Enfin 500 demonstrants hajan demonstrà venderdi notg, scriva la polizia. Tenor in pledader dals demonstrants saja la raschun principala da mussar solidaritad cunlas unfrendas tar ina demonstraziun en Tirchia. Là eran 2 persunas mortas e pliras 100 persunas vegnidas blessadas tar ina demonstraziun da la PKK. Las demonstraziuns sa drizzian però era cunter l'inscunter dals G7.
L'inscunter dals stadis G7 è la dumengia e glindesdi en l'hotel da luxus Schloss Elmau, datiers da Garmisch.
RR novitads 09:00