Siglir tar il cuntegn

Header

video
Libanon: Greva explosiun al port da Beirut
Or da Tagesschau dals 04.08.2020.
laschar ir
cuntegn

Detonaziun en il Libanon Bleras unfrendas suenter explosiun a Beirut – la Svizra vul gidar

A Beirut, la chapitala dal Libanon hai dà in'explosiun massiva. Las autoritads discurran il mument d'almain 100 unfrendas e radund 4'000 persunas blessadas. Quai ha communitgà la Crusch Cotschna. La raschun per l’explosiun n’è anc betg enconuschenta.

Sin maletgs che mussan l’explosiun pon ins l’emprim vesair ina pitga da fim, lura suonda in sfratg ed in grond nivel da fim stgir. Ina gronda part dal port è destruì cumplettamain. Persunas plain sang van per las vias ch'èn plain rument e scalgias. Tranter auter è er l’ambassada Svizra vegnida donnegiada. L’ambassadura svizra saja sa blessada levamain.

video
Fim suenter l'explosiun al port da Beirut
Or da News-Clip dals 04.08.2020.
laschar ir

Ammoniumnitrat sco raschun?

Sco pussaivla raschun numna il primminister dal Libanon, Hassan Diab ina gronda quantitad dad ammoniumnitrat. Radund 2'750 tonnas da quella substanza privlusa sajan deponidas – e quai senza mesiras da segirezza al port. Quai na possian ins betg giustifitgar. Ammoniumnitrat dovran ins tranter auter per siglientar e sch’igl è chaud po quella substanza explodir da sez.
Indizis per in'attatga u per in connex politic na datti il mument betg.

Cuminanza internaziunala sa mussa solidarica

Regenzas da blers pajais èn sa mussadas consternadas suenter l'explosiun a Beirut e fan amogna agid al Libanon. L'incumbensà da l'Uniun europeica per l'exteriur Josep Borell ha sincerà solidaritad senza restricziuns ed il cumplain sustegn da l'Uniun europeica. La Frantscha, l'anteriura pussanza mandataria, sco er l'Israel han medemamain annunzià lur agid.

Er la Svizra vul gidar

Il minister da l'exteriur, Ignazio Cassis, ha exprimì sias condolaziuns. La Svizra examinescha il mument, co ch'ella pudess gidar il Libanon il meglier. Ins saja vid examinar ils basegns e las cundiziuns d'in agid ensemen cun il center da management da crisa. Quai ha communitgà il Departament federal d'affars exteriurs.

Il mument n'haja il departament naginas infurmaziuns davart victimas svizras da l'explosiun. Actualmain sajan 20 turistas e turists svizzers registrads tar l'ambassada en il Libanon.

RTR novitads 06:00+

Artitgels legids il pli savens

Scrollar a sanestra Scrollar a dretga