Siglir tar il cuntegn

Header

cuntegn

Di da partida a Berlin SPD vul introducir taglia sin facultad

En la Germania vulan ils delegads da la SPD introducir ina taglia sin facultad. La finamira saja che burgais e burgaisas che possedan passa 2 milliuns euros ston pajar ina taglia da facultad da 1-2% al stadi. Ils socialdemocrats quintan cun entradas da radund 9 milliardas euros per il stadi.

Plinavant pretendan ils delegads da la SPD da surmuntar il frain a l'indebitament per pussibilitar da far dapli investiziuns. Avant aveva il schef da partida Norbert Walter-Borjans pretendì da francar la fin dal frain a l'indebitament en la constituziun.

L'Union na vul betg

Cun quellas pretensiuns ristga la SPD dentant ina dispita entaifer la Union. Per la scheffa da la CDU Annegret Kramp-Karrenbauer na vegni per exempel betg en dumonda da francar il frain a l'indebitament en la constituziun, uschia è ella s'exprimida envers la gasetta «Frankfurter Allgemeinen Sonntagszeitung». Il president da la secziun naziunala da la CSU en il Bundestag, Alexander Dobrindt ha accentuà che da midar la lescha fundamentala en quest reguard fiss «dal tuttafatg sbaglià».

Ina taglia sin facultad ha quai gia dà en Germania. Il 1995 aveva la dretgira constituziunala tudestga declerà la taglia sin facultad sco cuntraria a la constituziun ed abolì ella. Il 2017 ha la SPD desistì da agiuntar en ses program electoral da puspè reintroducir questa taglia.

Ord l'archiv

Video
Archiv SRF: Walter-Borjans ed Esken èn elegids sco schefs da SPD
Or da Tagesschau dals 06.12.2019.
laschar ir

RTR novitads 17:00