Il president russ Wladimir Putin ed il schef nordcorean Kim Jong Un paran da sa chapir bain. Suenter l'inscunter uffizial dad ier mesemna a Wladiwostok, ha il Kreml confermà in proxim inscunter dals dus manaders da stadi en la chapitala nordcoreana Pjöngjang. Quai preoccupescha observaders e observadras dal mund dal vest. I vegn temì che la Corea dal nord pudessia furnir armas e muniziun per la guerra russa en l'Ucraina e che la Russia sustegnia persuenter programs da satellits e da rachetas nordcoreans.
Ils Stadis Unids èn en general preoccupads pervi da l’inscunter. Il fatg ch’els discurrian dad ina collavuraziun tranter lur pajais pudess violar pliras resoluziuns dal Cussegl da segirezza da l’ONU – hai num da la vart dal ministeri da l’exteriur american. Putin ha retschavì Kim en in center spazial en l’ost da la Russia.