Cunquai ch'i dettia anc blera lavur vegnian las delegaziuns a restar pli ditg a Vienna per chattar ina buna schliaziun globala.
Curt avant avevan medias iranaisas rapportà che lur minister da l'exteriur Mohammed Dschawad Sarif vegnia a bandunar las tractativas per in di.
Las tractativas d'atom cun l'Iran èn gia avanzadas, tuttina èn pliras dumondas anc adina avertas. Per discussiuns procura surtut il fatg che l'Iran refusa l'inspecziun dad implants militars. Il vest insista però sin l'access per segirar ch'il pajais na construeschia betg novs implants atomars.
I na dat nagin motiv da concluder a la svelta questa nauscha cunvegna che vegn mendra da di tar di.
Il schef da la regenza israeliana, Benjamin Netanjahu rinfatscha a las pussanzas mundialas ch'ellas dettian suenter memia fitg en ils discurs d'atom cun l'Iran. I na dettia nagin motiv da concluder a la svelta questa nauscha cunvegna che vegnia mendra da di tar di, ha Netanjahu ditg tenor indicaziuns da ses biro.
La publicitad mundiala ignoreschia che Teheran offendia ils dretgs d'umans e sustegnia il terrorissem. Netanaju vala sco in dals gronds critichers da la cunvegna d'atom cun l'Iran.
RR novitads 15:00