En ils Stadis Unids ha il president en uffizi Donald Trump pretendì ch’il stadi federativ da Georgia midia posteriuramain il resultat da l’elecziun dal president. En in discurs al telefon ha el pretendì dal secretari da stadi da – «chattar avunda vuschs per el e lura recalcular il resultat». La gasetta Washington Post ha publitgà in excerpt da quest telefonat. Per la vicepresidenta elegida Kamala Harris ha Trump uschia malduvrà sia pussanza a moda impertinenta.
Trump ha pers l’elecziun il november. Dentant n’accepta el vinavant betg la victoria da ses concurrent, il democrat Joe Biden. Trump discurra vinavant da manipulaziuns e pretenda ch’ils democrats hajan engulà sia victoria. Quai dentant senza purtar x-in mussament per sias renfatschas.
Elecziun decisiva per il senat a Georgia
En il senat american n'èsi anc betg cler, tgi ch’ha la maioritad. Il mardi datti en il stadi federativ da Georgia in’elecziun decisiva per dus sezs libers. Ils republicans ston defender almain in da quels per salvar la maioritad en il senat – ed engrevgiar al nov president sia lavur. Il senat conferma numnadamain ils candidats per posts da regenza e dal tribunal suprem. Ultra da quai po el bloccar projects da leschas.
Nancy Pelosi è reelegida
Il nov parlament da l'USA è gia vegnì ensemen per l’emprima giada. Quai bun duas emnas avant ch’il president elegì Joe Biden entra en uffizi. En la chombra dals represchentants han ils democrats vinavant la maioritad. La democrata Nancy Pelosi è vegnida reelegida so pledadra da la chombra.
