Durant lur discurs haja Juncker declerà ch'el saja pront da discutar dumondas che pertutgan il brexit. Il medem mument ha el er signalisà che la cunvegna che saja uss sin maisa saja la sulet pussaivla. Quai ha annunzià ina pledadra da Juncker.
Plinavant veglia Juncker collavurar uschè bain sco pussibel cun Johnson. Per adina esser cuntanschibel in per l'auter hajan ils dus politichers barattà lur numers da telefon.
Hardliner brexit
En il parlament a Londra aveva Johnson pretendì da la Uniun Europeica da puspè seser ensemen vid ina maisa per negoziar da nov la cunvegna da sortida tranter la Gronda Britannia e la UE. La cunvegna che sia antecessura Theresa May haja negozià saja inacceptabla.
Boris Johnson crititgescha cunzunt la clausula che sclauda cunfin cun mirs, saivs e posts da duana tranter l'Irlanda dal Nord e la republica Irlandaisa. L'industria d'export e l'agricultura da l'Irlanda èn dependentas da vias da commerzi directas via la Gronda Britannia sin la fiera continentala.
RR novitads 17:00