Davant la costa da la Calabria en l’Italia dal Sid èn morts almain 58 migrantas e migrants tar ina disgrazia cun ina bartga, communitgeschan las forzas d'intervenziun. Il dumber da victimas pudess anc muntar cun quai che baras sajan anc en il mar.
Sco pliras medias talianas rapportan saja ina bartga da pestga cun var 150 persunas cupitgada. Tenor la guardia costala taliana saja la bartga collidada cun in grip paucs meters davant la costa. En tut hajan ins chattà u salvà var 80 survivents e surviventas, 20 sajan vegnidas transportadas en ospitals.
Ils migrants e las migrantas vegnan tenor emprimas enconuschientschas – da l’Iran, Pakistan ed Afganistan. Tenor rapports da medias saja la bartga vegnida da la citad da la Tirchia da l'ost Izmir.