Il primminister grec prend per part responsabladad per la greva disgrazia da tren en Grezia. Dapi passa 20 onns avevan las regenzas grecas tralaschà il traffic da viafier. Perquai n'han sistems da segirezza betg funcziunà.
Avant la disgrazia aveva in lavurer manà dus trens che gievan en la direcziun d'in lauter sin il medem binari. 57 persunas èn mortas pervia da la collisiun. La disgrazia ha chaschunà protests cunter la regenza en l'entir pajais.
Sistems electronics n'han betg funcziunà
Il sindicat da lavurers e lavureras da viafier demonstrava suenter la disgrazia megliers indrizs. Il lavurer aveva stuì tschentar en manualmain las stgomias dals trens. Cun in sistem electronic na fiss quai stà necessari, quel na funcziunava dentant betg pli. Er il primminister ha detg ch'i fiss memia sempel da dar la culpa mo a quai lavurer.
Er davart la scolaziun dal lavurer datti dumondas. L'um da 59 onns aveva per cumenzà avant in onn sia furmaziun tar la viafier. Tenor la lescha fiss el stà memia vegls. Avant la collisiun dals trens aveva el lura para ignorà avis e dumondas dad in dals locomotivists, sco er dad in auter lavurer, scriva la gasetta «Kathimerini».
