Vitiers ha Trump gia avertì e smanatschà cun in ulteriur augment sche la China reagescha cun dazis da vendetga cunter l'industria americana u l'agricultura americana. Lura vegnia introducida «fasa trais» che prevesa dazis sin ulteriurs products en ina valita da 267 milliardas dollars.
Uschia vul ins impedir ch'ils consuments americans ston patir memia fitg da las fatschentas da Nadal. Fin ussa è quai la pli greva frida en la dispita da commerzi che Trump ha fatg tenor il motto: «America First».
La China ed il Giapun èn inquietads
Il minister da commerzi chinais Zhong Shan ha ditg ch'ina guerra da commerzi na gidia nagina vart. La suletta via saja ina collavuraziun tranter ils dus stadis. Il viceprimminister Liu He ha clamà ad ina seduta per sa cussegliar davart reacziuns.
Er il Giapun è inquietà. Il minister d'economia Toshimitsu Motegi ha appellà ad omaduas varts da chattar tant pli spert ina soluziun per il conflict. Dazis e cuntradazis na possian betg esser en l'interess d'in stadi ha ditg Motegi.
Dapi l'entschatta da fanadur sa dispitan ils Stadis Unids e la China cun dazis da chasti e da vendetga sin rauba en ina valita da fin uss 100 milliardas dollars.
RR novitads 06:00