Dissonanzas tar l'inscunter dals G20

Ils Stadis Unids e la China han differenzas e quai gest en ina seria da dumondas: Els n’èn betg d’accord pertutgant la politica offensiva chinaisa en la mar chinaisa dal sid, in sistem da defaisa american encunter rachetas en la Corea dal Sid e la situaziun dals dretgs umans en la China.

Tuts ensemen davant ina pagoda chinaisa. Bild in Lightbox öffnen.

Legenda da maletgs: La fotografia tradiziunala da tut ils partecipants a l'inscunter suprem. Keystone

Il punct da critica central dad Obama envers la China è la politica da pussanza offensiva che la China persequitescha en la dispita pervi da las inslas en il mar chinais dal sid. Obama ha admonì il schef da regenza Xi Jinping da «consequenzas».

Sursiglir cuntegn supplementar

Ils G20

  • èn las 19 naziuns las pli industrialisadas cumprais novas naziuns industrialisadas («Schwellenländer») e tut l’Uniun europeica
  • s’engaschan dapi il 1999 per la cooperaziun e consultaziun en dumondas dal sistem da finanzas internaziunal
  • represchentan ensemen 90% dal potenzial economic dal mund
  • vegnan presidiads a partir da la fin dal 2016 da la Germania

Quel percunter na vul nagin che sa masda en en quel affar e sa mussa decidì da na balluccar a reguard la suveranità territoriala ed ils interess chinais en quella regiun.

Percunter consens tar la protecziun da clima

En in punct central èn ils dus pajais dentant stat d’accord. Avant l’inscunter suprem dals G20 han ils Stadis Unids e la China ratifitgà la cunvegna da clima da Paris. Cun ils dus pajais economicamain pli ferms dal mund po la cunvegna istorica per la protecziun dal clima vegnir realisada probablamain anc en il decurs da l’onn.

In tschertga dad ina via per terminar la violenza in Siria

Dentant rapportan las agenturas dad in moviment pussibel en la dumonda da la Siria. Ils Stadis Unids e la Russia tschertgassan ina via tar ina fin da la violenza en il pajais squassà da la guerra civila. Malgrà las tractativas intensivas na saja ina fin sperta da quellas anc betg en vista aveva communitgà Obama en il decurs dal di.

UE vul sustegn dals G20 tar crisa da fugitivs

L’UE pretenda dapli sustegn da tschels pajais dals G20. lls burdis d'in pajais en connex cun ils fugitivs duajan vegnir repartids a moda pli gista.

L’Europa saja curt avant il limit ha ditg il president dal cussegl da l’UE, Donald Tusk. Actualmain sajan 65 milliuns persunas sin la fugia sin tut il mund. Tuts stoppian perquai surpigliar responsabladad. La China e la Russia per exempel prendan si be paucs u nagins fugitivs sirians.

Discussiuns davart finanzas e relaziuns internaziunalas

Sin l’agenda uffiziala da l’emprim di da l’inscunter suprem dals G20 eran durant l’emprim di discussiuns davart la conjunctura mundiala. La chanceliera tudestga Angela Merkel ha manà a l’ur da l’inscunter discurs bilaterals cul president tirc Recep Tayyip Erdogan. Ils discurs hajan contribuì da schluccar vinavant la relaziun tranter ils dus pajais.

RR novitads 17:00