Siglir tar il cuntegn

Header

cuntegn

Exteriur Dolores O’Riordan dals «Cranberries» mora cun mo 46 onns

Dolores O’Riordan, la chantadura da «The Cranberries» è morta cun 46 onns. Ella saja morta nunspetgadamain, in rapport uffizial vegn dentant spetgà per l'avrigl 2018.

Tenor il statement da ses management era la chantadura da la gruppa da rock irlandaisa a Londra per registraziuns. La bunura dals 15 da schaner, han ins lura chattà O'Riordan senza vita en il bogn da sia chombra en il «Park Lane Hotel» a Londra. Davart las raschuns da la mort na dat quai enfin uss anc nagin rapport uffizial.

I va dentant la curella ch'ella saja morta d'ina surdosa dal medicament «Fentanyl». Quai è in medicament cunter la dolur che ha era chaschunà la mort da Prince, Tom Petty u Lil Peep.

Charta da funeral da Dolores O'Riordan
Legenda: Dolores O'Riordan è vegnida sepulida en il santeri da la baselgia «St. Ailbes» a Ballybricken. Keystone

«Zombie», in hit internaziunal

Ils «The Cranberries» èn vegnids enconuschents en ils onns 90 – surtut cun la chanzun «Zombie» che ha il conflict en l’Irlanda dal Nord sco tema. L’onn 1995 era questa chanzun in dals hits en plirs pajais europeics.

La band «The Cranberries» è vegnida fundada il 1989 a Limerick en Irlanda. Il 2003 è la band sa separada. O’Riordan ha lura cumenzà ina carriera da solo. Il 2009 è la band lura puspè vegnida ensemen. L’onn passà ha ella publitgà ses album «Something else» ed ha stuì dir giu plirs concerts pervi da problems cun il dies da sia chantadura Dolores O’Riordan.

RR novitads 20:00+

Artitgels legids il pli savens