Siglir tar il cuntegn
Inhalt

Exteriur Donald Trump è arrivà en il Giapun

Il president american è arrivà en il Giapun. Beneventà è el vegni da tschients schuldads americans e giapunais sin la basa militara americana Yokota.

Donald Trumo e Shinzo Abe.
Legenda: Donald Trump e Shinzo Abe han oz giugà golf e damaun cumenzan alura ils discurs uffizials. Keystone

I na dettia nagin meglier lieu da cumenzar cun ses viadi che sin questa basa militara ha ditg Trump. Uscheditg ch’el saja president vegnia el adina a dar al militar american las resursas giavischadas, uschia Trump vinavant. Oz è Trump sulet s’inscuntrà privat cun il primminister giapunais per giugar golf, scrivan las agenturas da novitads. Damaun vegn Trump alura a s’inscuntrar uffizialmain cun il primminister giapunais Shinzo Abe. Avant vegn el anc a far ina visita formala al imperatur giapunais Akihito. En ses emprim pled fitg patriotic en il Giapun èn era il commerzi e las vias avertas sur la mar stadas temas.

Viadi da duas emnas en l'Asia

Sin ses viadi da duas emnas en l’Asia vegn la Corea dal Nord ad esser in dals temas centrals da discussiun. Tranter auter vegn Trump a visitar la China, il Vietnam ed era las Filippinas. Era è in inscunter cun il president russ Wladmir Putin planisà ha ditg Trump. Ils dus presidents eran s’inscuntrads l’ultima giada al ur dal inscunter dals stadis G20 a Hamburg.

RR novitads 06:00