Siglir tar il cuntegn

Header

cuntegn

Exteriur Donald Trump encunter ils muslims

En ses cumbat electoral provochescha il top-candidat dals republicans cun ulteriuras pretensiuns. Muslims na duajan betg pli dastgar entrar en ils Stadis Unids.

Il candidat dals republicans per il presidi dals Stadis Unids Donald Trup ha pretendì in scumond d’entrar per tut ils muslims. Quai cun l’argument ch’ils muslims hassegian ils americans da princip.

Corey Lewandowski, il manader dal cumbat electoral da Trump, ha confermà sin dumonda da l'agentura da novitads Reuters ch'era turists e students duajan esser pertutgads da quest scumond - e betg mo fugitivs.

Mesemna passada aveva probabels terrorists sajettà giu 14 persunas en la citad da San Bernardino en la California. Ils dus attatgaders, in um ed ina dunna, eran muslims.

"Trump è irrità"

La Chas’alva a Washington ha sentenzià talas propostas da Trump. Questas propostas stettian en cuntradicziun cun ils principis fundamentals da la naziun americana.

Er ulteriurs candidats republicans èn sa distanziads da questas pretensiuns. Trump saja irrità, ha Jeb Bush scrit sin twitter.

Tenor las ultimas retschertgas maina Trump la cursa dals republicans per la candidatura per la successiun da Barack Obama. Las elecziuns presidialas èn ils 08 da november 2016.

RR novitads 06:00

Artitgels legids il pli savens