Donald Trump lauda il schef da stadi chinais Xi Jinping

Avant che bandunar la China ha Trump scrit sin Twitter che Xi saja in aut stimà e pussant represchentant da ses pievel.

Il schef da stadi chinais Xi Jingping ed il president american Donald Trump. Bild in Lightbox öffnen.

Legenda da maletgs: Il schef da stadi chinais Xi Jingping ed il president american Donald Trump. Keystone

Ils discurs davart la Corea dal Nord ed il commerzi sajan stads fritgaivels, uschia il president american vinavant. La dispita da commerzi tranter ils Stadis Unids e la China saja la culpa da ses antecessurs, ha Donald Trump era scrit. Detagls co ils dus pajais vulan schliar ils problems cun la Corea dal Nord n'èn però betg enconuschents.

Durant la visita dal president american en China han ils dus schefs da stadi suttascrit contracts d'economia cun in volumen da 250 milliardas dollars. En las medias statalas da la China èn tant l'atmosfera sco er ils resultats da l'inscunter vegnids ludads.

China fa in pass vers fatschentas da l'exteriur

Be curt suenter che Donald Trump ha terminà sia visita en China ha la regenza communitgà da vulair lubir a persunas e fatschentas da l'exteriur da surpigliar la maioritad dad interpresas da finanzas chinaisas.

Fin ussa dastgavan persunas u fatschentas da l'exteriur be surpigliar maximalmain 49% dad interpresas chinaisas en il sectur da finanzas. En l'avegnir duai esser lubì era ad els da surpigliar fin 51%. Ed er quest cunfin duai vegnir aboli cun il temp.

Er sche quella midada vegn gist uss, suenter la visita da Donald Trump, aveva la China gia instradà ordavant mesiras per schluccar las restricziuns per persunas da l'exteriur.

RR novitads 06:00