Donald Trump ristga in conflict cun la China

Il nov president american Donald Trump ristga in conflict cun la China, perquai ch’el ha telefonà cun la presidenta dal Taiwan Tsai Ing Wen.

Donald Trump e Tsai Ing Wen. Bild in Lightbox öffnen.

Legenda da maletgs: Donald Trump ha telefonà cun la presidenta dal Taiwan Tsai Ing Wen. Keystone

Para han els discurrì davart las relaziuns economicas e politicas tranter ils dus pajais. La regenza a Washington è sa distanziada immediatamain da l'agir da Trump. La politica fin uss vers la China restia tuttina, ha communitgà la regenza americana.

Avant plirs decennis avevan ils Stadis Unids suspendì las relaziuns uffizialas cun il Taiwan. Quai era ina da las premissas per relaziuns diplomaticas cun la China.

La China ha «suttastritgà sia posiziun en chaussa cun vehemenza»

La China protestà uffizialmain cunter il discurs al telefon tranter il president futur dals Stadis Unids, Donald Trump, e la presidenta dal Taiwan, Tsai Ing-wen.

La regenza a Peking haja prendì enconuschientscha dals rapports e suttastritgà sia posiziun en chaussa cun vehemenza. Quai ha communitgà il ministeri da l’exteriur chinais.

La regenza americana duaja restar fidaivla a sia politica cun la China da fin qua, pretenda il ministeri da l’exteriur. I dettia be ina China. Per la China è il Taiwan ina provinza malfidaivla. Tuttina han ils Stadis Unids tgirà nunuffizialmain contacts cun il Taiwan.

RR novitads 06:00++