Siglir tar il cuntegn

Exteriur Donald Trump uffizialmain candidat per il presidi american

Suenter las preelecziuns che han cuzzà mais ha el obtegnì la maioritad necessaria da las vuschs dals delegads al di da partida dals republicans a Cleveland.

Donald Trump sin tribuna al di da partida dals republicans a Cleveland.
Legenda: Donald Trump al di da partida dals republicans a Cleveland. Keystone

Gia tar las preelecziuns da tut ils stadis federativs aveva Trump cuntanschì il dumber necessari da 1'237 delegads. Ussa sto el anc acceptar sia nominaziun. Ma quai vala sco formalitad.

Sco candidat per il vicepresidi han ils republicans nominà Michael Pence, il guvernatur d'Indiana. El vala sco fitg conservativ. Pence duai gidar Trump da gudagnar vuschs dals socialconservativs e dals evangelicals.

Forzas da segirezza a Cleveland.
Legenda: Forzas da segirezza che surveglian las demonstraziuns a Cleveland. Keystone

Nominaziun ha chaschunà demonstraziuns

Pervi da la nominaziun da Donald Trump sco candidat republican pe ril presidi american hai da ulteriuras demonstraiuns en il center da la citad da Cleveland. Sin la plazza den vischinanza da l'arena nua ch'il di da partida dala republicans è actualmain, hai dà cunfruntaziuns da pliras gruppas d'adversaris ed aderents da Trump.Tenor la polizia n'è però nagin vegnì arrestà u blessà.

Avant il di da partida dals republicans aveva la citad da Cleveland prendì mesiras da segirezza spezialas e dumandà l'agid da forzas da segirezza da plirs stadis federativs.

RR novitads 06:00