Siglir tar il cuntegn

Header

cuntegn

Donezk e Luhansk La Svizra condemnescha – na piglia però naginas sancziuns

Il Cussegl federal condemnescha l'agir da la Russia: Cun renconuscher las regiuns separatisticas en l'ost da l'Ucraina sco agens stadis independents, cuntrafetschia la Russia al dretg internaziunal e violeschia ils dretgs territorials da l'Ucraina. La Svizra sezza na piglia però naginas sancziuns.

La Svizra na renconuscha betg l'independenza da las regiuns Donezk e Luhansk. Questas regiuns restian part da l'Ucraina en l'ost dal pajais, ha la secretaria da stadi Livia Leu gia ditg il mardi. Suenter sia sesida ha il Cussegl federal anc ina giada confermà questa posiziun. La Svizra condemneschia che la Russia haja renconuschì las republicas sco independetas.

Mesiras en furma d'ordinaziuns

Il mument na sa participeschia il Cussegl federal betg a las sancziuns da la Uniun europeica e dals Stadis Unids drizzadas a la Russia. Ins analiseschia però quellas en detagl e veglia prender mesiras per che quella na possia betg guntgir las sancziuns via la Svizra – Quai en furma d'ordinaziuns. En questa furma aveva la Svizra er gia reagì il 2014 cura che la Russia aveva annectà la peninsla Krim.

Cuntinuar cun la missiun d'observaziun

Plinavant veglia la Svizra s'engaschar per che la missiun zivila d'observaziun possia agir vinavant sin il territori da l'Ucraina. Ils observaders e las observadras ageschan en il rom da l'Organisaziun per la segirezza e collavuraziun en l'Europa (OSCE). Era duain ils commembers e las commembras svizras lavurar vinavant per la missiun, uschia il Cussegl federal. Gist en ina situaziun da crisa saja impurtant ch'i dettia infurmaziuns objectivas davart la situaziun da segirezza en il pajais.

Davent da l'entschatta crititgà l'agir da la Russia

Gia glindesdi saira ha la Svizra supplitgà la Russia da sa tegnair vid obligaziuns internaziunalas e da reveder la decisiun e condemnà che la Russia ha renconuschì las regiuns separatisticas Donezk e Luhansk.

audio
Conflict en l'Ucraina: La Svizra crititgescha l'agir da la Russia
ord Actualitad dals 22.02.2022.
laschar ir. Durada: 2 minutas 49 Secundas.

Tranter parlamentaris e parlamentarias grischunas a Berna van las opiniuns in'ord l'autra. Entant ch'il socialdemocrat Jon Pult pretenda sancziuns er da la Svizra, pledeschan ses collegas Martin Candinas da l'Allianza dal Center ed Anna Giacometti dals liberaldemocrats plitost cunter sancziuns.

audio
Conflict en l'Ucraina: Reacziuns da parlamentaris grischuns
ord Actualitad dals 22.02.2022.
laschar ir. Durada: 3 minutas 26 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga