Siglir tar il cuntegn

Header

Dus policists mascrads la notg avant ina chasa.
Legenda: Gia la gievgia saira è la polizia belgia stada activa en il quartier Schaerbeek da Brüssel. Reuters
cuntegn

Exteriur Duas explosiuns tar razzias a Brüssel

En la chapitala belgia ha la polizia fatg ulteriuras razzias suenter las attatgas da mardi passà.

En il quartier Schaerbeek a Brüssel ha la polizia arrestà ina persuna. E tenor indicaziuns uffizialas ha la polizia neutralisà pliras bumbas. La televisiun da la Belgia RTBF aveva rapportà da duas explosiuns. E sco l'agentura da novitads Belga aveva rapportà, aveva la polizia bloccà l’access en il conturn, ed appellà als abitants da restar en lur abitaziuns.

Identifitgà in ulteriur attentader

Entant ha la Procura publica da la Belgia confermà, ch'in segund attentader da suicid da l'eroport da Brüssel saja vegnì identifitgà. I sa tracta da Najim Laachraoui. El ha para gì colliaziuns cun Salah Abdeslam ch'era vegnì arrestà l'emna passada e ch'aveva participà als attentats da Paris.

Gia avant acziuns da la polizia

En connex cun ils attentats da Brüssel aveva la polizia gia arrestà la gievgia saira pliras persunas suspectadas , sco la Procura publica ha communitgà. Arrestaziuns en connex cun Brüssel hai era dà en la Germania, sco la pagina “Spiegel Online” a rapportà.

Tar las attatgas terroristicas sin la plazza aviatica e la metro da Brüssel mardi passà èn 31 persunas mortas, e radund 300 èn vegnidas blessadas.

RR Novitads 16:00+

sda/ba

Artitgels legì il pli savens

Nach links scrollen Nach rechts scrollen