Siglir tar il cuntegn

Header

Donald Trump e Hilary Clinton durant la debatta.
Legenda: Donald Trump e Hilary Clinton durant la debatta. Keystone
cuntegn

Exteriur Duel da televisiun: Trump discurra da cumplot

Donald Trump e Hillary Clinton han cruschà las spadas per la terza ed ultima giada avant l’elecziun per il presidi american. Il candidat republican ha danovamain discurrì da supposiziuns da manipulaziun en vista a las elecziuns dals 8 da november.

La debatta da 90 minutas è stada engaschada e per part intensiva. La democrata ed il republican èn vegnids en ils chavels tar temas sco abort, leschas d’armas e l’occupaziun dals pli auts posts da derschaders.

En il duel ha Trump danovmain tschentà en dumonda da reconuscher ils resultats d'elecziun dals 8 da november. «Jau vegn lura a guardar quai, betg ussa.», uschia Trump.

Ils ultims dis aveva Trump discurrì pliras giadas dad in cumplot e pretendì che l'elecziun vegnia manipulada. Cumprovas u indizis persuenter n'ha el però betg pudì furnir.

La Russia vesa pli gugent ina poppa sco president american.
Autur: Hilary Clintoncandidata democratica per il presidi american

Clinton ha rinfatschà a ses cuntracandidat da sustegnair la spiunascha cunter l'agen pievel. I saja evident che las ultimas attatgas da hacker, ch'han manà a la publicaziun da datas sin la plattafurma da scuverta Wikileaks, sajan vegnidas timunadas da circuls da la regenza russa, uschia Clinton.

Trump e Clinton durant il duel da televisiun.
Legenda: Ils dus candidats sajettan cun ferma muniziun. Keystone

Trump haja pliras giadas exprimì laud envers il president russ Wladimir Putin. Il president russ sustegnia Donald Trump perquai ch'el haja pli gugent ina «poppa sco president dals Stadis Unids», uschia Clinton.

El n'enconuschia betg Putin, ha ditg Trump. Il president russ na saja betg ses meglier ami. I saja però segir d'avantatga sch'ils Stadis Unids sa chapeschian cun la Russia.

Hillay discurra dapi 30 onns, na dumogna però nagut sin la retscha.
Autur: Donald Trumpcandidat republican per il presidi american

Trump da sia vart ha ditg che Clinton na saja «betg abla». En il sectur privat haja el fatg bler meglra lavur ch'ella en il sectur public. Trump ha punctuà sias prestaziuns sco um da fatschenta ch'haja stgaffì firmas. A Clinton ha el ditg ch'ella discurria dapi 30 onns, na dumognia però nagut sin la retscha.

Tenor in'enquista da l'emettur CNN ha Hillary Clinton gudagnà er quest duel. Tar l'enquista da l'institut Ipsos ch'è vegnida fatga suenter il segund duel da televisiun (12 d'october) maava Clinton cun in avantatg dad 8% sin Trump.

La successura u il successur da Barack Obama vegn elegì ils 8 da november.

RR novitads 06:00

Artitgels legids il pli savens

Scrollar a sanestra Scrollar a dretga