Siglir tar il cuntegn
Inhalt

Exteriur «Dultscharias u lumparias» – «Trick or Treat»

Dapi intgins onns van era ils uffants en las valladas grischunas da chasa tar chasa per rimnar dultscharias la saira dals 31 d'october. Ma propi enconuschenta per quest usit è l'America. E vi sur mar datti era almain ina Rumantscha ch'è en fevra da Halloween.

Angela Hendry viva cun ses um Ralph - ch'è medemamain in Svizzer - dapi quatter onns e mez a Texas, datiers da Dallas. Mintgamai la fin d'october èn els en fevra da Halloween. Era lur dus uffants Sophie ed Ayden giaudan da sa costumar e rimnar las dultscharias.

Halloween: Da l'Europa en l'America – e retour

Tenor ina legenda levan ils morts en vita l'emprim di da november. Halloween è ina tradiziun pajauna che vegniva celebrada dals pievels celtics e gals avant 2'500 onns – oravant tut en l'Europa. Ils cristians han cumbattì questa tradiziun. Perquai ha Papa Gregor IV fixà la festa catolica da Numnasontga sin l'emprim da november.

En l'Irlanda ed en l'Engalterra èn tscherts rituals restads. Durant il 19avel tschientaner han immigrants irlandais importà Halloween en l'America. Las ravas cun chandailas èn vegnidas remplazzadas cun zitgas. E dapi intgins onns turna l'usit da Halloween puspè en l'Europa ed era en las regiuns rumantschas.

RR actualitad 17:00