Uschè bleras spezias d'animals na sajan anc mai stadas smanatschadas. Il dumber pertutgia bunamain 30% da tut las spezias d'animals examinadas. Uschia scriva il WWF en connex cun sia nova glista da victurs e perdents en il mund dals animals.
Tranter ils perdents è per exempel la tschuetta da naiv. Lur populaziun era vegnida stimada sin 200'000. En realitad datti però be anc 28'000 da quests utschels. Meglier vesi or tar ils tighers en il Nepal. Els tutgan tar ils victurs dals animals da quest onn. L'onn 2009 devi be anc 120 tighers en il Nepal. Ussa saja lur dumber creschì sin passa 230.
Ils exempels mussian che las mesiras per proteger las spezias d'animals funcziunian. Ma la via per mantegnair la diversitad dals animals saja crappusa, uschia l'incumbensà da la communicaziun dal WWF, Philip Gehri.
RR novitads 12:00