Siglir tar il cuntegn

Header

Navigaziun

In schuldà en l'umbriva avant ina baselgia.
Legenda: In schuldà stat guardia avant ina da las baselgias attatgadas en la Sri Lanka. Reuters
cuntegn

Exteriur Dumber d’unfrendas en la Sri Lanka crescha

La polizia da la Sri Lanka discurra da nov da 290 unfrendas, suenter las attatgas cun bumbas sin baselgias ed hotels. Malgrà che la polizia ha arrestà passa 20 persunas, restan las circumstanzas da las attatgas en il stgir.

Las attatgas sin baselgias en diversas regiuns da la Sri Lanka e sin hotels a Colombo ed en la regiun da la chapitala, èn succedidas bunamain il medem temp. Per part han attentaders da suicidi fatg las attatgas. La polizia discurra da nov da radund 550 persunas blessadas.

Betg dal tut ina surpraisa

La regenza da la Sri Lanka ha declerà, da vulair examinar pussaivels lioms internaziunals cun ina gruppa d’extremists locals. Plinavant ha ella concedì ch’i haja dà gia avant infurmaziuns davart pussaivlas attatgas sin baselgias, en connex cun ina gruppa locala d’islamists pauc enconuschenta.

Dapli arrestaziuns

Tar ina razzia en ina chasa en la chapitala Colombo, ha la polizia arrestà tenor atgnas indicaziuns 13 persunas. Tuts sajan burgais da la Sri Lanka. Tar l’acziun sajan trais policists morts. En tut ha la polizia uschia arrestà 24 persunas en connex cun las attatgas.

Pli tard han ins chattà ina bumba construida a moda simpla sin ina da las vias che mainan a l’eroport da Colombo. Spezialists hajan lura allontanà la bumba e destruì quella.

RR novitads 08:00