Siglir tar il cuntegn

Header

Il minister da giustia da la Belgia, Koen Geens.
Legenda: Il minister da giustia da la Belgia, Koen Geens. SRF
cuntegn

Exteriur Dus ministers beltgs mettan uffizis a disposiziun

Dus commembers beltgs dal cabinet han mess a disposiziun lur uffizis suenter las attatgas da terror: Il minister da giustia Koen Geens ch’è actualmain en critica, ed il minister da l’intern Jan Jambon. Il primminister Charles Michel duai avair refusà las demissiuns.

  • la Belgia conferma per l’emprima giada in connex direct tranter ils attentaders da Brüssel e Paris
  • il minister da giustia Koen Geens admetta, ch’infurmaziuns davart la privlusadad da Ibrahim El Bakraoui n’èn betg vegnidas dadas vinavant avunda svelt
  • il minister da giustia ed il minister da l’intern Jan Jambon porschan lur demissiun
  • a l’eroport da Brüssel partan aviuns il pli baud puspè il glindesdi a bun’ura

Colliaziun tranter Paris e Brüssel

Las autoritads belgias han confermà ina colliaziun directa tranter ils attentaders da Brüssel ed ils attentats da Paris. Il december passà avev’ins decis in cumond d'arrest europeic ed internaziunal cunter l'attentader da suicidi Khalid El Bakraoui. Ad el era vegnì renfatschà dad avair fittà sut in fauss num in' abitaziun a Charleroi en la Belgia per ils attentaders da Paris. Quai ha la Procura publica federala da la Belgia communitgà. L'abitaziun haja servì sco zup a la gruppa da terrorists.

Demissiun da dus ministers

Il minister da l'intern ed il minister da giustia da la Belgia han mess lur uffizis a disposiziun. Quai suenter ils attentats terroristics a Brüssel e suenter ch'i pudess avair dà pannas tar las investigaziuns. Quai conferman ils biros dals dus ministers envers l'agentura da novitads Belga. Ma il primminister Charles Michel ha refusà las dumondas da demissiun. Quai pervi da la «situaziun da guerra». Tenor Michel lavuran las autoritads cun tutta forza per sclerir ils attentats.

Dumber da blessads crescha

Enstagl da 270 blessads discurra il ministeri da sanadad da la Belgia uss da 300 persunas cun blessuras grevas u pli levas. 61 persunas basegnan anc tractament sin ina staziun intensiva.

La partida socialdemocratica da Domat vul defender ses sez en l'executiva
Legenda: La malencurada suenter las attatgas terroristicas da Brüssel è anc adina gronda. Keystone

Ier saira èn plirs tschients collavuraturs e vischins da l'eroport da Brüssel sa radunads per commemorar las unfrendas da las attatgas. Da quellas eran 31 persunas mortas il mardi avantmezdi.

Impediments da traffic restan

Suenter l'attentat sin l'eroport da Brüssel ha la societad aviatica Swiss stritgà fin glindesdi da Pasca tut ils sgols da e vers Brüssel. Per ch'ils passagiers arrivian tuttina a lur destinaziun, porscha la Lufthansa bus da shuttle da Frankfurt a Brüssel. Er passagiers da la Swiss pon far diever da questa purschida.

Il traffic da tren vers Brüssel è entant sa normalisà. Tenor las Viafiers federalas èn iIs dus trens che curseschan direct da Basilea a Brüssel partids tenor urari.

RR novitads 06:00 / 17:00 / 18:00

sda/SRF/um/alb

Artitgels legì il pli savens

Nach links scrollen Nach rechts scrollen