Siglir tar il cuntegn

Header

Il hotel «Splendid» ad Ouagadougou il di suenter l’attatga terroristica.
Legenda: Il hotel «Splendid» ad Ouagadougou il di suenter l’attatga terroristica. Keystone
cuntegn

Exteriur Dus Svizzers tranter las unfrendas

Er dus Svizzers sa chattan tranter las unfrendas da l'attatga terroristica sin in hotel da luxus en la chapitala da Burkina Faso, Ouagadougou. Quai ha confermà il Departament federal per fatgs da l'exteriur. La bandiera sin la chasa federala è vegnida messa sin mesa asta.

Tenor pliras funtaunas sa tracti da l'anteriur directur da La Posta, Jean-Noël Rey, e da l'anteriur deputà dal parlament vallesan Georgie Lamon. En memoria da las unfrendas da l'attatga è la bandiera svizra sin la chasa federala la dumengia ed glindesdi sin mesa asta, quai ha annunzià la Confederaziun.

Attatga islamistica il venderdi

Venderdi saira aveva ina gruppa d'islamists attatgà in restaurant ad Ouagadougou. Silsuenter han els prendì ostagias en l'hotel vischinant «Spendid», che vegn preferì da persunas dal vest.

La sonda en damaun han las forzas da segirezza lura assaglì l'hotel, liberà ils ostagis e mazzà 3 attatgaders. In ulteriur attatgader è mort tenor indicaziuns da las autoritads en in hotel datiers, nua ch'el era sa zuppà.

Ostagis da 18 differents pajais

Dals 126 ostagis che las forzas da segirezza han pudì liberar, èn 56 vegnidas blessadas per part grevamain durant l'assagl. Quai communitgescha la regenza da la Burkina Faso.

Surpiglià la responsabladad per l'attatga han duas gruppas d'islamists, ina tutga tar la rait da la Al-Kaida. Omaduas gruppas avevan gia fatg il november passà in’attatga sin in hotel en il pajais vischinant il Mali. Lura eran mortas en la chapitala Bamako 20 persunas.

RR Novitads 06:00+

Artitgels legids il pli savens

Scrollar a sanestra Scrollar a dretga