Siglir tar il cuntegn

Header

L'Africa dal Vest è puspè libra d'ebola.
Legenda: L'Africa dal Vest è puspè libra d'ebola. Keystone
cuntegn

Exteriur Ebola: WHO annunzia fin d'alarm

L'epidemia d'ebola en l'Africa dal Vest na saja betg pli in privel global. A questa conclusiun vegn l'organisaziun mundiala da sanadad WHO. Ella ha abolì il stadi d'urgenza global. Tras La malsogna d’ebola èn passa 11’000 persunas mortas en ils stadis da l’Africa dal Vest.

L’organisaziun mundiala da sanadad WHO ha declerà il stadi d’urgenza da sanadad en consequenza da l’epidemia d’ebola sco terminà. La decisiun ha communitgà la directura generala da la WHO Margaret Chan a Genevra.

Malgrà singuls novs cas da l’epidemia saja la situaziun per la gronda part sut controlla. La WHO è uschia suandada ad ina recumandaziun d’experts internaziunalas. Il medem di avevan lezs discutà davart il decurs da l’epidemia ch’era rutta or il december 2013 en l’Africa dal Vest.

Ils experts sajan vegnids a la conclusiun che tuttas restricziuns dal traffic da viadi internaziunal en connex cun la tema d’ebola possian vegnir abolidas, ha ditg Chan.

42 dis senza novs cas

Il comité d’experts ha declerà che la chadaina d’infecziun saja cunzunt interrutta en la Guinea, la Liberia e la Sierra Leone. Quests pajais èn stads pertutgads il pli fitg da l’epidemia.

Il temp da 42 dis – quai è il dubel dal temp d’incubaziun maximal – saja vegnì terminà senza novs cas da la malsogna, uschia ils experts.

Lung temp senz'acziun cunter epidemia

Il motiv per ils ultims cas d’ebola en la Guinea èn tenor il comité stads survivents che purtavan anc il virus. Talas infecziuns sajan er vinavant pussaivlas, schebain ch’ellas giajan enavos marcantamain.

La WHO aveva proclamà il stadi d’urgenza da sanadad l’avust 2014, quai pir suenter pliras emnas senz’acziun. Totalmain èn mortas da l’epidemia 11’300 persunas, dapli che 28’000 eran s’infectadas.

RR novitads 06:00

sda/dpa/SRF/alb

Artitgels legì il pli savens

Nach links scrollen Nach rechts scrollen