Siglir tar il cuntegn

Header

Navigaziun

cuntegn

Exteriur Eclat diplomatic tranter Tirchia e Pajais Bass cuntinua

Ils viadis da propaganda dals politichers tircs en Europa procuran vinavant per confruntaziuns. Suenter l’eclat diplomatic tranter ils Pajais Bass e la Tirchia haja dat demonstraziuns en tuts dus pajais. Uss pretenda il minister da l’exteriur tirc ina perstgisa dals Pajais Bass.

Suenter l’eclat pervi da la visita scumandada da la ministra da famiglia tirca a Rotterdam ha la regenza tirca annunzià cuntramesiras gravantas. Il prim-minister tirc Binali Yildirim ha communitgà che la resposta vegnia dada sin moda e maniera la pli greva. Vinavant ha el appellà als Tircs - che vivan en l'exteriur - da restar calm.

En il fratemp ha era s’annunzià il minister da l’exteriur Cavusoglu puspè. Suenter che ses aviun n'aveva betg survegnì il permis da platgar en ils Pajais Bass, è el sa mess en viadi en Frantscha. Cavusoglu è viagià a Metz en Frantscha per ina proxima occurrenza ed ha ditg là tenor l’agentura da novitads tudestga DPA la dumengia avant schurnalists:

Nus vegnin ad instradar pass, nus vegnin ad instradar pass da gronda purtada e suenter vegn l’Ollanda a sa perstgisar tar la Tirchia.
Autur: Mevlüt Cavusogluminister da l'exteriur, Tirchia

Tgenins pass ch’el manegia, n’haja el betg declerà.

Il president tirc sa vilenta dal vest «islamofob»

Davent da la Tirchia svida il president tirc Erdogan sez ieli en il fieu engraziond a la Frantscha dad avair laschà entrar ses minister da l’exteriur per discurrer. Quai ha rapportà l’agentura da novitads franzosa AFP. Il vest saja «islamofob» ed avessi mussà uss sia fatscha reala.

En pli ha Erdogan rinfatschà a las medias tudestgas, da rapportar sbagliadamain dal sistem presidial, ch'el vul installar.

RR novitads 14:00+

Tirchia: Votaziun 16 d'avrigl

La votaziun tirca davart il midament da la constituziun per largiar la pussanza presidiala dad Erdogan è ils 16 dad avrigl. Al mument èn divers politichers tircs en viadi tras l’Europa per far propaganda per la votaziun. Dispitas e discussiuns haja dat pervi da quai er en Svizra ed en Svezia.

Pajais Bass: Elecziuns 15-03

En ils Pajais Bass vegn elegì in nov parlament. La victoria da la partida liberà da dretga VVD dal schef da regenza actual Mark Rutte vegn periclitada oravant tut da la partida per la libertad PVV dal populist da dretga Geert Wilders.