L'attentat saja schabegià en la chapitala Quito durant in’occurrenza dal cumbat electoral. Tier in sajettim cun la polizia saja era l'attentader supponì vegnì mazzà. Via X – pli baud Twitter – ha il president en uffizi, Guillermo Lasso, condolà als confamigliars ed empermess ch’il crim vegnia intercurì a fund. La gievgia ha el plinavant declerà il stadi d'urgenza en il pajais, che duai valair 60 dis.
Fernando Villavicencio ha adina puspè crititgà la corrupziun ch'è fitg derasada en il stadi sidamerican. Il schurnalist e deputà da 59 onns è stà in d'otg candidats e candidatas per l’elecziun da presidi. Ils 20 d'avust han lieu en l'Ecuador elecziuns parlamentaras e presidenzialas anticipadas, suenter che Lasso ha gì schlià si il parlament. Quai durant ch'i dat ina procedura da relaschada d'uffizi encunter el – pervia dal suspect da cugliunaria.
Villavicencio è stà en enquistas sin plaz dus per las elecziuns per l'uffizi da president ed ha tutgà tar in moviment dal center. Ad Ecuador hai dà in'unda da violenza avant l'attentat. La quota d'assassins ha surpassà perfin quella da Mexico. La regenza dat cunzunt la culpa al commerzi cun drogas. L'onn passà èn 25 persunas vegnidas assassinadas per 100'000 abitantas ed abitants, la pli auta quota en l'istorgia dal pajais.
