Datiers da la chapitala dalla provinza Al-Arisch sin la peninsla Sinai hajan attatgaders laschà explodir pliras chargias explosivas enturn ina moschea. Quella saja stada fullanada cun cartents che faschevan l'uraziun dal venderdi.Suenter hajan ils terrorists anc sajettà sin quels che han pudì scappar.
Il dumber da morts crescha cuntinuadamain
Gist suenter l'attatga discurrivan las autoritads da 54 morts. Curt suenter è il dumber creschì sin varga 100 ed è uss tar 235 unfrendas. Plinavant vegn fatg quint cun passa 120 blessads.
Forzas da segirezza persequiteschan actualmain ils attatgaders en il conturn da la moschea da Al-Rawdah. Il stadi da l'Egipta ha proclamà in temps da cordoli da trais dis per las unfrendas da l'attatga.
Territori da bloccada
Sin la peninsla dal Sinai cumbatta ina part da la milissa terroristica Stadi Islamic gia dapi onns cunter las forzas da segirezza egipzianas. En il visier dals terrorists èn cunzunt policists e forzas militaras. Quellas intervegnan numnadamain massivamain cunter pussaivels terrorists. Sin la peninsla Sinai ch'è per gronda part territori bloccà datti adina puspè conflicts tranter quellas partidas.
RR novitads 14:00 ++