Siglir tar il cuntegn
cuntegn

Exteriur Egipta: Al-Sissi è vegnì reelegì

Il president da l'Egipta Abdel Fattah Al-Sisi è reelegì per in'ulteriura perioda d'uffizi.

 Abdel Fattah al-Sissi.
Legenda: Concurrents serius ha el tar l'elecziun betg gì. Keystone

Cun 97% da las vuschs è l'actual president egipzian Abdel Fattah Al-Sisi sa mess tras cunter ses adversari Mussa Mustaffa ed resta uschia per in'ulteriura perioda en uffizi.

Exact il medem cumpart da vuschs aveva Al-Sisi er cuntanschì tar las elecziuns avant quatter onns. Questa giada è la participaziun a las elecziuns dentant stada considerablamain pli bassa.

Gia cler avant l'elecziun

Ch'i na vegnia betg a dar ina midada tar il timun egipzian era gia cler avant l'elecziun. Pertge tut ils concurrents serius eran sa retratgs avant las elecziuns – per part pervia da raschuns dubiusas.

Critichers renfatschan al frestg-elegì d'avair supprimì l'opposiziun e la pressa. Ses aderents èn dentant da l'avis che las mesiras dad Al-Sisi sajan stadas necessarias per stabilisar il pajais e per evitar revolta islamisticas.

Emprima elecziun suenter cupitgada

Al-Sisi era il 2014 vegnì elegì sco president suenter ch'el aveva cupitgà l'emprim president egipzian elegì democraticamain, l'islamist Mohammed Mursi.

RR novitads 17:00