Siglir tar il cuntegn

Header

cuntegn

Exteriur Egipta en stadi d'urgenza pervia dals attentats sin cristians

Almain 45 persunas perdan la vita suenter dus attentats da bumba sin baselgias copticas en las citads Alexandria e Tante.

  • En l’Egipta en entaifer curt temp detunadas la dumengia duas bumbas en baselgias cristianas.
  • Almain 45 persunas èn vegnidas mazzadas, passa 120 persunas èn blessadas
  • Il secretari general da l'ONU Antonio Guterres ha condemnà las duas attatgas sin cristians.
  • Il president da l'Egipta Abdel Fattah al-Sisi ha proclamà per ils proxims 3 mais il stadi d'urgenza en il pajais al Nil.

Tanta

En la citad egipziana da Tanta èn mortas 27 persunas tar in’ explosiun en ina baselgia. Dapli che 59 persunas sajan vegnidas blessadas. Quai ha communitgà il ministeri da la sanadad a l'agentura da novitads sda.

Alexandria

Era en il nord da l’Egipta hai dà ina explosiun davant ina baselgia cristiana. La televisiun statala rapporta dad ina detunaziun en la citad dad Alexandria. In attentader da suicidi è para sa siglientà en l’aria davant la baselgia da Son Marcus. Quai è la baselgia la pli veglia dad Alexandria e cun quai in lieu fitg simbolic da l’Egipta. Tenor il ministeri da sanadad egipzian èn almain 11 persunas mortas e passa 30 èn vegnidas blessadas. La regenza egipziana ha discurrì dad in act terroristic.

Attatga sin baselgia a Cairo il december 2016

Var 10% dals abitants en l’Egipta èn cristians. Malgrà singulas tensiuns vivan els paschaivlamain ensemen cun la maioritad muslima. Il december passà eran però mortas var 25 persunas tar in grev attentat da bumbas sin ina baselgia. Quella giada era la milissa terroristica Stadi islamic sa declerada responsabla per l’attentat.

RR novitads 12:00+

Artitgels legids il pli savens