Il schef da drogas mexican Joaquín «El Chapo» Guzmán sto ir en praschun per vita duranta. En pli stoppia el pajar ina summa da passa 12 milliardas dollars. Quai ha decis ina dretgira a New York. Gia il favrer aveva la dretgira declerà el culpant en tut ils puncts d’accusaziun. Tranter auter pervi da la producziun e vendita da drogas e pervi da lavada da daners suspectus.
Guzmán vala sco pli grond barun da drogas dapi il Columbian Pablo Escobar. Ad el è tranter auter vegnì renfatschà d'avair importà entras ses cartel 1'200 tonnas cocain, passa 49 tonnas mariuana e dapli che 200 kg heroin en ils Stadis Unids.
Pliras giadas fugì ord praschun
Il 2015 eri gartegià a Guzmán da fugir tras in tunnel ord ina praschun d'auta segirtad mexicana.
Per evitar in'ulteriura fugia da «El Chapo» vegn el a stuair passentar il rest da sia vita en ina praschun d'auta segirezza datiers dals Rocky Mountains en ils Stadis Unids.
RR novitads 17:00