Las partidas soras cristiandemocraticas regentas CDU e CSU han gudagnà cleramain las elecziuns dal Landtag en ils pajais federativs tudestgs Hessen e Baviera. Las partidas da la coaliziun d'Ampel (SPD, Verds e FDP) dal chancelier tudestg Olaf Scholz han fatg cleras perditas.
En cumparegliaziun cun la Germania èn Baviera e Hessen duas regiuns economicas fermas. Dumbrà ensemen vivan stgars 20 milliuns umans en ils dus pajais federals – quai èn bunamain 24% da la populaziun tudestga.
Suenter il resultat provisoric, publitgà en l' internet, vegn la CSU dal president da la regenza Markus Söder en Baviera sin 37,0% (2018: 37,2%). Las electuras ed ils electurs libers conservativs, cun regents, sa chattavan cleramain sin 15,8% (2018: 11,6%) e furman uschia en l' avegnir la segund ferma forza. Ina cuntinuaziun da la coaliziun vertenta è pia segirada.
Ils Verds e las Verdas sco forza d'opposiziun la pli gronda da la Baviera èn sa pegiurads cleramain ed han fatg anc 14,4 % da las vuschs (2018: 17,5 %). L'AfD è sa meglierada cleramain sin 14,6% (2018: 10,2%). La partida SPD dal chancelier ha cuntanschì en Baviera mo in resultat da 8.4% (2018: 9.7 %). Tenor calculaziuns approximativas ha la PLD (liberala) fatg naufragi cun 3.0% (2018: 5.1%) tar ils obstachels da 5% per puspè entrar en il Landtag.