Sinn Fein succeda uschia sco la pli ferma forza, la protestant-unionistica DUP che sto magunar fermas perditas. Igl è l’emprima giada ch’ina partida è la ferma forza, che s’engascha per sa distatgar da la Gronda Britannia e la fusiun cun la republica da l’Irlanda. E quai vala sco midada simbolica en l’istorgia da la provinza fundada avant bun 100 onns.
Cun la victoria ha la topcandidata da Sinn Fein Michelle O'Neill il dretg sin il post da scheffa da regenza. Fin uss er il schef da regenza adina d’ina partida che sustegneva da restar en l’uniun cun la Gronda Britannia. Da furmar la nova regenza pudess dentant vegnir dir per Michelle O’Neill.
Tenor il contract da pasch da l’onn 1998 per l’Irlanda dal Nord ston mintgamai las duas grondas partidas or dals dus champs confessiunals en la regiun sa cunvegnir ad ina collavuraziun aifer ina regenza unitara. La protestant-unionistica DUP ha dentant gia annunzià, da betg vulair far part d’ina regenza ord protest cunter il status spezial da Brexit per l’Irlanda dal Nord.
