Siglir tar il cuntegn

Header

Navigaziun

cuntegn

Exteriur Elecziuns anticipadas en Spagna

Pedro Sánchez.
Legenda: Il primminister spagnol, Pedro Sánchez, ha annunzià elecziuns anticipadas. Keystone

La Spagna elegia en var dus mais in nov parlament. Ils 28 d'avrigl hajan lieu las elecziuns anticipadas. Quai ha communitgà a Madrid il primminister socialistic Pedro Sánchez. Las proximas elecziuns regularas fissan vairamain previsas pir per il zercladur 2020.

La mesemna era ina crisa rutta ora en Spagna, suenter ch'il parlament aveva refusà il preventiv da la regenza da minoritad. Duas partidas separatisticas da la Catalugna n'avevan betg sustegnì il preventiv.

Il socialist Sánchez è pir il zercladur passà daventà primminister, quai suenter in votum da disfidanza cunter ses antecessur conservativ Mariano Rajoy. Tranter auter avevan ils Catalans sustegnì Sánchez.

RR novitads 12:00