La ÖVP ha tenor las ultimas calculaziuns obtegnì 31,7% da las vuschs – quai è in plus da 8% cumpareglià cun las elecziuns dal 2013. Sin plaz dus suonda la SPÖ, ils socialdemocrats dal chancelier actual Christan Kern cun 26,9%. E sin plaz trais suonda la FPÖ, la dretga cun il schef da partida Heinz-Christian Strache cun 26% da las vuschs.
Suenter lur resultat da record da 12,4% avant quatter onns han ils Verds pers quest onns vuschs. Tenor calculaziuns approximativas cuntanschan els be 3,3%. Quai è ina perdita da passa 9% cumpareglià cun las elecziuns avant quatter onns.
Per il resultat definitv mancan anc las vuschs da la votaziun en correspundenza.
Cun questa constellaziun èsi però fitg probabel che Sebastian Kurz daventa successur dal chancelier Christian Kern. Cun quai fiss el cun be 31 onns il pli giuven sche da regenza da l'Europa.
Tenor experts han las partidas dretgas gudagnà perquai ch'ellas han propagà ina lingia dira en la tematica dals fugitivs.
Fugitivs e migraziun è stà per blers il tema decisiv
Ursulina Stupan è oriunda da Scuol, viva e lavura però gia dapi 10 onns en l'Austria a Graz. Tenor ella na sajan blers betg stads cuntents cun il fatg ch'ils fugitivs che sajan vegnids dapi il 2015 survegnian bler sustegn dal stadi – ils indigens però pauc.
Ella lavura sco massadra ed er en il discurs cun ses clients haja ella sentì ch'ils indigens na sajan savens betg cuntents. Els survegnian in «na» fertant che persunas da l'exteriur vegnian sustegnidas fermamain.
Per la dunna en ils 30 èsi cler, ch'i dovra ina midada en la politica. Tar blers saja la speranza qua ch'il conservativ Sebastian Kurz cun sia ÖVP portia quella. Che la regenza probabla da la ÖVP e da la dretga FPÖ daventia ina regenza extrema na crai ella betg. I dettia bain in u l'auter extremist che giavischia quai, ma la gronda massa na saja betg uschia.
Er Sebastian Kurz sez ha plidà suenter las elecziuns per ina politica constructiva ed ina cultura da l'in cun l'auter. Quai spetgian ils Austriacs uss suenter il cumbat electoral intensiv.
RR novitads 18:00 ++