Alexander Van der Bellen è vegnì reelegì per ina segunda perioda d’uffizi da sis onns sco president da la Republica austriaca. Tenor il resultat final provisoric dal ministeri da l’intern a Vienna vegn l’anteriur schef dals Verds da 78 onns sin bunamain 55% da las vuschs. Quai è avunda per vegnir elegì en l'emprim scrutini. Sin il segund plaz suonda il candidat da la dretga FPÖ, Walter Rosenkranz, che vegn sin 19% da las vuschs. 800'000 vuschs da brev duain anc vegnir dumbradas.
ll president da la Confederaziun Ignazio Cassis ha gia gratulà ad Alexander Van der Bellen suenter las emprimas calculaziuns dumengia saira. Ils dus pajais collia dapli che las Alps ed il Lai da Constanza: politicamain, economicamain e culturalmain, ha scrit Cassis sin Twitter. El sa legria da cuntinuar cun il partenadi amicabel e strategic.
President durant temps da crisa
Van der Bellen è president dapi il 2017. In quel temp ha el passentà plirs scandals e crisas, sco l'affera d'Ibiza cun Heinz-Christian Strache da la partida da dretga FPÖ u la fin da la carriera politica dad ex-chancelier Sebastian Kurz. Van der Bellen ha offert tranquilitad durant questas inquietezzas.
Opposiziun be da la FPÖ
L'anteriur schef dals Verds da 78 onns vegn sustegnì da tut las partidas parlamentaras auter che da la partida da dretga FPÖ. Per quella ha candidà Walter Rosenkranz.
