Siglir tar il cuntegn

Header

cuntegn

Exteriur Elecziuns en l’Iran: Ils refurmaturs èn ils victurs

Ils refurmaturs iranais èn ils victurs da l'elecziun dal cussegl d'experts en l’Iran. Quest cussegl è il pli impurtant gremi religius dal pajais. Ils commembers elegian alura il manader da la revoluziun, la pli auta instanza dal pajais.

En il pli impurtant district en la chapitala Teheran van 15 da 16 sezs en il cussegl d’experts als refurmaturs. L’anteriur president dal Iran Akbar Haschemi Rafsandschani ed l’actual president Hassan Ruhani èn ils clers victurs. Quai communitgescha il ministeri dal intern dal Iran. Dals uschenumnads hardliners è en la chapitala sulet Ajatollah Ahmad Dschannati vegni elegi en il cussegl d’experts. L’ulteriur candidat Ajatollah Mesbah Jasedi ha pers ses mandat. Dschannati e Mesbah valan sco ils pli gronds critichers dal program da refurmas dal actual president Ruhani.

Cussegl d’experts elegia il schef dal stadi

Ils 88 clericals commembers dal cussegl d’experts furman il pli aut gremi religius dal pajais. Els elegian alura il schef da stadi. Ils 16 represchentants da la chapitala Teheran han gronda influenza sin questas elecziuns. Cun la victoria dals refurmaturs vegn probabel Rafsandschani a daventar il manader dal cussegl. Tenor observaturs vegnan uss Rafsandschani e Ruhani a reducir l’influenza dals hardliners en il cussegl d’experts ma er en l’entira politica en l’Iran, scrivan las agenturas da novitads.

RR novitads 10:00

Artitgels legids il pli savens