Siglir tar il cuntegn

Header

cuntegn

Exteriur Elecziuns en la Republica Centralafricana annulladas

L'emprima runda da l'elecziun parlamentara en la Republica Centralafricana è vegnida annullada pervi da numerusas irregularitads.

Schegea che las elecziuns èn annulladas, datti dumengia proxima la segunda runda sco planisà. Malgrà che l'elecziun dals 30 da december saja stada paschaivla ed i haja dà ina gronda partizipaziun, haja quai dà irregularitads, ha declerà il president dal tribunal constituziunal. Tenor el ha quai dà total 414 reclamaziuns pervi da manipulaziuns.

Regenza transitorica resta en uffizi

Quai munta che la regenza transitorica resta per il mument en uffizi. La lescha pretenda ussa ch'i vegnia organisà entaifer 60 dis ina nova runda d'elecziun. Las elecziuns parlamentaras en la Republica Centralafricana valan sco impurtant pass enavos a la stabilitad.

Giavisch da stabilitad suenter temp da cumbats sanguinus

La Republica Centralafricana era sfundrada en la violenza suenter la derschida dal president François Bozizé il mars 2013. En cumbats sanguinus tranter milissas cristianas e muslimas eran vegnidas mazzadas plirs milli persunas. Pir ina intervenziun internaziunala sut la batgetta da la Frantscha aveva mess ina fin a la violenza l'entschatta dal 2014.

RR novitads 08:00

Artitgels legids il pli savens