En plirs pajais da l'Uniun europeica hai para dà emprovas da manipular las elecziuns europeicas. I n'haja bain betg dà attatgas grondas da hackers, ha ditg il cumissari da segirtad da l'UE Julian King a la gasetta "Welt am Sonntag". Però sajan las metodas adina pli subtilas. I vegnia empruvà da rinforzar svilups gia existents cun dischinfurmaziun intenziunada. Quai na dastgian ins betg acceptar sco normalitad, ha ditg King. Gia actualmain dettia gronds effects entras metodas da dischinfurmaziun subtilas e sin mesira.
Provas da manipulaziun en almain 8 stadis
En Spagna hajan ins chattà ina rait da contos da Twitter - bots e profils fictivs - ch'han chatschà hashtags antiislamics per sustegnair la partida populistica da la dretga Vox. Sumegliantas acziuns haja quai era dà en l'Austria, Pologna, Rumenia, Lettonia, Italia, Frantscha e Gronda Britannia. Quai demussia ch'i dovria ulteriuras mesiras dals stadis commembers, però era da Facebook, Google e Twitter, ha ditg King.
Examinar sufficienza dal codex actual
King vul ussa examinar, sche las reglas actualas davart dischinfurmaziun èn sufficientas. Las reglas avevan Facebook, Google e Twitter suttascrit l'october 2018. El ha annunzià che la conferenza da l'UE en 2 emnas vegnia a tractar la problematica da Manipulaziun en l'internet.
RR novitads 15:00