I saja temp da smetter «illusiuns egemonas» che mainan a guerras, ha il minister da l'exteriur da l'Iran Mohammed Dschawad Sarif ditg. Enstagl che mintgin emprovia dad esser il ferm en la regiun saja da reunir las forzas. Perquai veglia l'Iran uss tschertgar il dialog cun ils pajais dal Golf en connex cun la segirtad en la regiun. Tenor Sarif duai ina «rait da segirtad» remplazzar ils «blocs da segirtad».
Quest postulat è vegnì parallel cun l'inscunter dal president american Donald Trump cun il president franzos Emmanuel Macron a Washington. Er quels han discurrì davart l'influenza da l'Iran en il Proxim Orient. Trump smanatscha da desdir la cunvegna d'atom cun l'Iran, sche il program da rachetas e l'influenza da l'Iran sin ils conflicts regiunals na duai betg vegnir tematisà pli fitg.
RR novitads 06:00