La populista da la dretga, Marine Le Pen vegn sin bun 33,94%. Quai annunzia il ministeri da l'intern franzos. Cun 20,8 milliuns vuschs ha Macron bunamain il dubel da las vuschs da Le Pen. Cun la terrada dala populista a dretga è il privel che la Frantscha extreschia da l'Uniun europeica stgatschà. Macron vegn ad esser il pli giuven president en l'istorgia da la Frantscha. El ha 39 onns.
Reacziuns sin l'elecziun da Macron
Entant ha Le Pen concedì sia terrada, telefonà a Macron e gratulà ad el per sia victoria. L'Uniun europeica ha reagì cun levgiament sin il resultat da l'elecziun. Il president da la cumissiun da l'UE, Jean Claude Juncker, ha declerà ch'el saja cuntent ch'ils Franzos hajan elegì in futur europeic cun Macron. Entant ha era il president russ Wladimir Putin reagì sin las elecziuns en Frantscha. El ha appellà ad Emmanuel Macron da surventscher la disfidanza vicendaivla. Sulet uschia saja da cuntanscher stabilitad e segirezza internaziunala ha scrit Putin en in telegram da gratulaziun. Sco quai ch'il Kreml communitgescha saja Putin pront da collavurar a moda constructiva. Durant il cumbat electoral aveva Moscau mussà simpatias per Marine Le Pen. Politichers russ quintan cun ina relaziun bilaterala difficila sut Macron.
Doris Leuthard e l’economia svizra èn cuntents
La presidenta da la Confederaziun, Doris Leuthard ha gratulà ad Emmanuel Macron per si'elecziun. La Svizra e la Frantscha sajan colliadas entras las medemas valurs: libertad e democrazia. Ella saja persvadida ch'i dettia uschia ina basa stabila per ina buna cuntinuaziun da la collavuraziun, ha ditg Leuthard. Insumma regia levgiament tar l’economia e la plazza da finanzas en Svizra. Cunquai saja in ulteriur factur da malsegirezza nagin tema pli. Analists da bancas e perscrutaders da conjunctura partan l’avis che la Banca naziunala svizra stoppia ussa intervegnir damain sin ils martgads da devisas. La banca na vegnia betg pli a star uschè ferm sut squitsch per tegnair il curs dal franc tar in 1.07 envers l'euro.
Suenter l'elecziun è avant l'elecziun
Sin il nov president spetga gia in proxim cumbat electoral. En bun in mais elegian ils Franzos lur assamblea naziunala. Da las elecziuns dals 11 e 18 da zercladur dependa, schebain il nov schef dal stadi ha ina maioritad dals parlamentaris u betg. Sche quai n'è betg il cas restrenscha quai fermamain ses spazi d'agir.
4,2 milliuns cedels vits e nunvalaivels
Tenor l'institut Ipsos han 4,2 milliuns Franzos mess in cedel vit u nunvalaivel en l'urna. Quai èn prest 9% da tut las persunas cun dretg d'eleger e tant sco anc mai en Frantscha. La participaziun a l'elecziun è stada cun 74,3% uschè bassa sco mai pli dapi il 1969.
RR novitads 21:00/6:00