Las retschertgas mussan in avantatg per l'independent Emmanuel Macron. Tenor ellas vulan radund 60% da las Franzosas e dals Franzos vuschar per el, e mo 40% per sia contrahenta dretg-populistica Marine Le Pen. Tenor Charles Liebherr, correspundent dad SRF en Frantscha, èsi er fitg probabel ch'el daventa propi il nov «président».
In punct nunenconuschent
Tenor el datti sulet in grond punct ch'è nunenconuschent e quai èn quels votants che n'han en l'emprim scrutini vuschà ni per Macron ni per Le Pen. Quai èn bunamain la mesadad - la gronda dumonda è sche quels van uss insumma ad eleger. E quai pudess er anc avair influenza sin il resultat. Vi dal fatg che Macron daventa president n'avess quai dentant da midar nagut manegia Liebherr.
Macron ha gì cletg
Bler è stà calculaziun politica, uschia Charles Liebherr. La finala haja Macron dentant er gì cletg. Sch'el fiss vegnì ensemen cun François Fillon en il segund scrutini avess la situaziun forsa vesì or auter. Ensemen cun Le Pen saja Macron dentant en ina situaziun confortabla.
RR actualitad 07:00