Siglir tar il cuntegn

Header

cuntegn

Elecziuns Frantscha 2017 Macron surpassa Le Pen, Fillon perda sustegn

En Frantscha s'avischina il termin da las elecziuns per il presidi, ils 23 d'avrigl. Fertant ch'ina retschertga vesa per l'emprima giada il candidat independent Macron avant l'extrem-dretga Le Pen, vegn Fillon vi e pli sut squitsch da sia atgna partida.

Las elecziuns franzosas

Avrir la box Serrar la box

Las elecziuns per il presidi franzos vegnan observadas pervi da Marine Le Pen en il mund. Blers teman, ch'ella haja schanzas da vegnir presidenta. L’emprima runda d’elecziun è ils 23 d’avrigl. Ils experts spetgan, che nagin candidat cuntanscha il pli absolut (50%+). La segunda è ils 7 da mai tranter ils dus candidats cun las pli bleras vuschs.

Tenor la retschertga da l’institut Odoxa vegn Emmanuel Macron sin 27% (+2%) da las vuschs e Marine Le Pen sin 25,5% (-1,5%). Il candidat conservativ François Fillon riva danovamain mo sin 19% da las vuschs e n’arrivass uschia betg en il segund scrutini, l’elecziun da tagl tranter ils dus candidats cun las pli bleras vuschs.

Fillon perda entant vinavant sustegn da l'atgna partida

Il candidat dals conservativs per il presidi franzos François Fillon perda vi pli il sustegn da l'atgna partida.

Ses pledader da medias è sa retratg e l'anteriur prim-minister Dominique de Villepin ha pretendì, che Fillon retiria sia candidatura. In cumbat electoral tematic na saja betg pussaivel pervi da las inquisiziuns cunter Fillon, ha ditg de Villepin envers l'emettur da radio «Europe 1». Ordavant aveva gia il manader dal cumbat electoral da Fillon retratg ses sustegn.

«Penelopegate» è la trapla nua che Fillon ristga da crudar en

Cunter Fillon vegn actualmain investigà en il uschenumnà «Penelopegate». La gasetta da satira franzosa «Le Canard enchainé» aveva publitgà da curt pajaments da radund 800’000 euro, che Fillon haja fatg a sia dunna Penelope per lavurs sco assistenta parlamentara. Tgeninas lavurs ch’ella ha fatg per quels raps n’è anc betg vegnì mussà si.

RR novitads 17:00

Artitgels legids il pli savens