Siglir tar il cuntegn

Header

Angela Merkel.
Legenda: Angela Merkel resta chancelliera tudestga, sia partida CDU dovra uss in partenari da coaliziun. Keystone
cuntegn

Elecziuns Germania 2017 Cun tgi vegn Angela Merkel a reger la Germania?

Suenter las elecziuns da la fin d’emna è avant furmar la regenza nova. Las duas partidas grondas CDU e SPD perdan omaduas vuschs. La SPD na vul betg pli.

audio
Elecziuns en Germania
ord Actualitad dals 25.09.2017.
laschar ir. Durada: 1 minuta 13 Secundas.

La SPD perda cleramain las elecziun e vegn cun 20,5% da las vuschs sin il mender resultat dapi la fundaziun da la Republica Federala Tudestga. Perquai ha la SPD decis svelt ch’ella na vul betg far part pli da la coaliziun gronda e ch’ella va en l’opposiziun.

Era CDU perda vuschs

Ma era la partida regenta la CDU perda vuschs. Ella vegn sin 33% da las vuschs quai che munta in minus da 8%. Tuttina resta Angela Merkel chanceliera tudestga ed ha uss il pensum da furmar la regenza. Ina coaliziun pussaivla fiss la uschenumnada coaliziun da Jamaica tranter la CDU, la FDP ed ils Verds.

AFD terz ferma partida en il Bundestag

La Alternativa für Deutschland (AfD) vegn terz ferma partida cun 12,6% da las vuschs. Uschia dumogna la partida da l’extrema dretga senza problems il segl en il parlament tudestg. La quart ferma partida cun 10,7% vegn la FDP. Uschia fan ils liberals il pass enavos en il Bundestag, quai suenter ch’els eran tar las ultimas elecziuns sulet vegni sin 4,8% da las vuschs ed uschia crudads ord il parlament. Era la partida Sanestra (9,2d%) sco ils Verds (8,9%) han omadus pudì augmentar lev lur cumpart da vuschs ed omaduas partidas fan il segl danovamain en il parlament.

Legenda:
Il resultat da las elecziuns dal parlament da la Germania tenor vuschs ZDF

Buna participaziun

La participaziun a las elecziuns en Germania è stada lev sur quella dal onn 2013. Uschia èn la fin d’emna passada 76,2% ids ad eleger, il 2013 eran quai anc 71,5%. En tut eran radund 61,5 milliuns Tudestgas e Tudestgs clamads a l’urna. Da sa decider han els giu tranter 42 partidas e 4’828 candidatas e candidats.

RR novitads 06:00

Artitgels legids il pli savens