Siglir tar il cuntegn

Header

video
Edith Albin vul plitost constanza …
Or da RTR dals 19.09.2017.
laschar ir. Durada: 39 Secundas.
cuntegn

Elecziuns Germania 2017 «Jau ma sent insumma betg pli uschè datiers da la Germania...»

Quai di Edith Albin. Ella è oriunda dad Aachen e dapi bunamain 30 onns en Svizra. Tuttina vegn ella savens percepida sco Tudestga. In fatg ch'è per ella magari era frustrant.

audio
Mezdi: Elecziuns en Germania – l'istorgia persunala d'Edith Albin
ord Actualitad dals 18.09.2017.
laschar ir. Durada: 5 minutas 25 Secundas.

Entras maridar haja ella survegnì immediatamain il dretg da votar en Svizra e vis quai sco gronda schanza. Uschia saja ella vegnida politisada sco giuvna en Svizra e la politica cun ils cussegliers federals saja ad ella bler pli datiers che quella en Germania. Quai che giria en sia patria persequiteschia ella be en las medias sco quai dad auters pajas er.

Mantegnì ha la pura da Tersnaus en Val Lumnezia però il contact cun parents e collegas. Ed er ils uffants hajan in bun contact cun la parentella ad Aachen.

Decis per in pajais ed ina cultura - tuttina resta ina percepziun

Edith Albin n'ha betg fatg il spagat tranter la Svizra e la Germania. Ella ha decis da viver en in pajas cun ina cultura. Er ils uffants ha ella educà sapientivamain sco Svizzers e Rumantschs. Quai saja sa dà senza grondas ponderaziuns, ella haja però sentì cun il temp ch'i saja bun uschia. I saja er gartegià, ma:

Quai è per mai magari bunamain frustrant ch'ins va simplamain da quai anora che jau stun adina per mia patria, ma i n'è betg uschia.
Autur: Edith Albin Tudestga che viva dapi bunamain 30 onns en Svizra

Bain haja ella gugent sia patria, ma ella sa sentia fitg svizra fitg rumantscha. En quest connex ha mancà en il passà e manca anc adina ad Edith Albin ina sort barat da cultura. Ella avess gugent sch'ils indigens dumandassan, discurrissan pli savens sur da quai ch'ins senta e pensa. Er per chapir mintgatant meglier daco ch'insatgi fetschia insatge auter che auters.

Edith Albin sesa en sia cuschina a Tersnaus.
Legenda: Ad Edith Albin plascha la vita purila a Tersnaus en la Lumnezia. Magari dovra ella però puspè in zic aria d'ina citad. RTR, Gion Gieri Flepp

Il giavisch: dapli directadad

Sco oriunda dad Aachen vegn Edith Abin che viva uss a Tersnaus en Lumnezia dad ina regiun fitg urbana. En general, ma cunzunt là èn las Tudestgas ed ils Tudestgs pli directs ch'ils Svizzers. Quels èn tenor ella fitg curtaschaivels. Quai saja d'ina vart bun, da l'autra vart giavischass ella magari in zic dapli da la directadad dals Tudestgs:

... ch'ins di era ina giada cler e bain, curtaschaivlamain però tuttina a grad ora, quai u tschai disturba mai, quai avess jau gugent auter u quai na chapesch jau betg ...
Autur: Edith Albin pura da Tersnaus en Val Lumnezia, oriunda dad Aachen

Traffic public ed emetturs da radio èn il hit en Svizra

Il meglier plaschan ad Edith Albin la punctualitad e la vasta rait dal traffic public en Svizra cumpareglià cun la Germania. Plinavant taidla ella fitg gugent las emissiuns da pled dals differents emetturs naziunals e sa era bunamain dal tut ordador, cura che tge emissiun vegn nua. La qualitad dal radio saja immens buna, accentuescha la dunna che ha studegià agricultura avant che vegnir en Svizra.

Sche Edith Albin guarda enavos sin tut ils bunamain 30 onns ch'ella è uss en Svizra, faschess ella probabel anc ina giada la midada da la Germania en Svizra. Magari dettia però er muments, nua ch'ella ponderass. Ma quai tutgia tar la vita ed ins stoppia adina puspè guardar sin il positiv. E da quai dettia qua fitg bler, concluda Edith Albin.

RR actualitad 12:20

Artitgels legids il pli savens