Discordia tar la CDU/CSU

Suenter ils resultats maghers da las elecziuns da la fin d’emna sa mussa discordia en las retschas dals cristiandemocrats en Germania. La direcziun a la quala la partida duai ir en futur è il mument anc intscherta.

Ils dus parsuras da las partidas, Angela Merkel e Horst Seehofer. Bild in Lightbox öffnen.

Legenda da maletgs: Ils dus parsuras da las partidas, Angela Merkel e Horst Seehofer. Keystone

Ella saja segira che la partida na dovria betg ina manada a la dretga, ha ditg la vice-parsura da la CDU Julia Klöckner avant ina sesida cun il presidi da la CDU. «Impurtant saja da tematisar quai che fatschenta la populaziun en il center da la societad», ha ditg Klöckner. Era la parsura da la CDU a Berlin Monika Grütters refusa cleramain ina lingia pli conservativa da la CDU/CSU.

CSU vul limitar il dumber da fugitivs

Dentant ha il schef da la CSU Horst Seehofer annunzià ch’els vegnian a pretender durant ils discurs da coaliziun che las empermischuns fatgas vegnian tegnidas, tranter quellas saja era la limitaziun dal dumber da fugitivs, ha ditg Seehofer a Minca. Impurtant saja da furmar ina regenza cleramain en il center da la dretga. La CSU saja conscienta ch’ina regenza po sulettamain vegnir furmada cun ella ed ella surpiglia era questa responsabladad, ha ditg Seehofer.