Germania: Schleppa che clingia per Schulz e sia SPD en NRW

Tenor emprimas calculaziuns dals emetturs ARD e ZDF ha la CDU surpassà cun 34,5% la SPD ch’è arrivada mo tar 30,5%. Las elecziuns dal parlament en Nordrhein-Westfalen da questa dumengia valan sco prova generala per las elecziuns naziunalas en Germania.

Martin Schulz. Bild in Lightbox öffnen.

Legenda da maletgs: Suenter la terrada en Nordrhein-Westfalen vegn la situaziun per martin schulz betg pli simpla. Keystone

Tenor emprimas calculaziuns dals emetturs ARD e ZDF han ils cristian-democrats da la CDU surpassà cun 34,5% la SPD ch’è arrivada mo tar 30,5%. Ils cristian-democrats èn ussa la forza pli ferma en il parlament da Nordrhein-Westfalen e vegnan probablamain er a pudair preschentar il schef da regenza or da lur partida.

L’anteriura partida pli ferma, la social-democratica SPD, ha subì grevas perditas: la partida da la scheffa da la regenza Hannelore Kraft è crudada da 39,1% sin 30,5%.

Terz ferma forza è vegnida la partida liberala FDP cun 12% cun ses shooting-star Christian Lindner.

Nordrhein-Westfalen vala sco indicatur per las elecziuns naziunalas

Nordrhein-Westfalen – u cun abreviaziun «NRW» – è il stadi federativ cun la pli auta populaziun da tut ils 16 stadis federativs tudestgs. Radund 1/5 da las electuras ed ils electurs da la Germania vivan qua.

Ellas ed els eran clamadas questa dumengia a l’urna per eleger lur parlament. Tgi ch’arriva da persvader questa fin d’emna la populaziun da Nordrhein-Westfalen po quintar cun ina posiziun ferma en las elecziuns dal parlament tudestg ils 24 da settember 2017.

Uss vegni fitg serius per Martin Schulz (SPD)

Las emprimas calculaziuns laschan supponer che Martin Schulz e la SPD vegnan anc pli ferm sut squitsch ch'enfin uss. Che la SPD perda suenter las elecziuns en il Saarland ed en Schleswig-Holstein er en Nordrhein-Westfalen è ina veritabla schleppa per l'um, che vul succeder l'atun 2017 ad Angela Merkel sco chancelier tudestg.

La primministra socialdemocratica da Nordrhein-Westfalen Hannelore Kraft ha entant annunzià da sa retrair da ses post. Ella surpiglia tut la responsabladad per la terrada da sia partida,ha ditg Kraft suenter l'elecziun.

RR novitads 18:00+