Il conflict tar la AfD escalescha

La parsura, Frauke Petry na vul betg appartegnair a la fracziun da sia partida en il parlament. Ella veglia occupar in post singul en il Bundestag.

Frauke Petry banduna la conferenza da medias. Bild in Lightbox öffnen.

Legenda da maletgs: Frauke Petry banduna la conferenza da medias. Keystone

Durant ina conferenza da medias da la AfD ha la presidenta da la partida Frauke Petry declerà, ch’ella na vegnia betg a far part da la fracziun da la partida. Ella vegnia ad entrar en il Bundestag sco deputada singula. Quai haja ella decidì suenter lunga reflexiun. Dentant veglia ella vinavant persequitar ina politica conservativa e realisar las ideas raschunaivlas che la AfD haja elavurà dapi il 2013. Suenter questa decleraziun ha Petry bandunà la conferenza da medias.

Dapi ditg è enconuschent ch’i dat tensiuns en la AfD. La critica da Petry sa drizza surtut cunter il topcandidat da la partida Alexander Gauland e sias polemicas da l’ultim temp che han procurà per lingias grassas. Pli detaglià n’ha Petry betg prendì posiziun oz, ella vegnia dentant a declerar sias raschuns ils proxims dis.

Er per il co-president da la partida Jörg Meuthen è la decisiun da Petry stada ina surpresa. Sco el ha declerà, n’haja Petry betg discurrì oravant cun el sur da questa decisiun. El ha crititgà che Petry haja l’ultim temp sa distanzià memia ferm dals dus topcandidats Alice Weidel ed Alexander Gauland.

RR novitads 11:00