Martin Schulz ha anc ina giada dà tut

Gist dasper sia patria ad Aachen ha el anc ina giada cumbatti cun tutta forza per vuschs... encunter la dretga AfD ed encunter sia adversaria per il post da chancelier, la chanceliera actuala Angela Merkel.

Però: la gronda raspada ch'era sa radunada sin il Katschof, il plaz tranter catedrala e chasa communala ad Aachen, ha stuì avair pazienza. A l'entschatta ha ina band indigena procurà per atmosfera da festa. Lura han ils candidats locals ed ulteriurs exponents naziunals da la SPD fatg reclama. Tranter auter er il parsura da la SPD Nordrheinwestfahlen, Michael Groschek che ha chattà clers pleds:

«  Tgi che vul sa laschar en sin il ristg renta cun 70... quel po eleger Merkel. Tgi che ha però tut las scadiolas en stgaffa, quel elegia Martin Schulz... »

Michael Groschek
parsura da la SPD Nordrheinwestfahlen

Suenter bun in'ura cun musica e diversas rundas da dumondas a candidats locals ed exponents da la SPD èsi lura finalmain stà uschè lunsch. En ina mar da bandieras contschen-alvas da la SPD e blauas cun las stailas da l'Uniun europeica è Martin Schulz vegni sut ovaziuns sin tribuna. Ed er è ha gist cumenzà cun clers pleds:

«  I smanatscha per l'emprima giada dapi 1945 ch'ils chavafossas da la democrazia vegnan puspè en il Bundestag. Perquai ir a vuschar dumengia tegnair la dretga extrema uschè pitschna sco pussaivel. »

Martin Schulz
candidat per il post da chancelier tudestg

Bun in'ura ha Martin Schulz empruvà da mussar las differenzas tranter la CDU, la partida d'Angela Merkel e la SPD. El ha tranter auter er renfatschà ad Angela Merkel ch'ella copieschia tut quai dals auters, n'haja però naginas atgnas ideas per il futur dal pajais.

La finala ha el serrà sia ultima occurenza en il cumbat electoral sut ovaziuns dals dad Aachen. Il Katschhof ha el tratg e gì cumplainamain da sia vart. La glieud è per part stada quasi euforica e cuntrari a las occurenzas cun la chanceliera Angela Merkel n'hai dà insumma nagins disturbis, be applaus e conferma.

RR actualitad 07:00